គ្រឹះស្ថានមីក្រូហិរញ្ញវត្ថុ អម្រឹត បានសហការជាមួយក្រសួងអប់រំ យុវជន និងកីឡា សារមន្ទីរសេដ្ឋកិច្ច និងរូបិយវត្ថុ ព្រះស្រីឦសានវរ្ម័ន (ស.ស.រ) ព្រមទាំងគណៈកម្មាធិការជាតិអូឡាំពិកកម្ពុជា ដើម្បីរៀបចំព្រឹត្តិការណ៍រត់ប្រណាំង ១០ គីឡូម៉ែត្រ ៥ គីឡូម៉ែត្រ និង ២.៥ គីឡូម៉ែត្រ ដែលនឹងប្រារព្ធធ្វើឡើង នាថ្ងៃអាទិត្យ ទី២៤ ខែឧសភា ឆ្នាំ២០២៦ ខាងមុខនេះ ដែលព្រឹត្តិការណ៍នេះ មានឈ្មោះថា “១ ម៉ឺនជំហាន ដើម្បីសិស្ស ១ម៉ឺននាក់” ក្រោមប្រធានបទ “រត់ ដើរ ដើម្បីលើកកម្ពស់ការអាន និង សារមន្ទីរ ស.ស.រ” ។
កម្មវិធីនេះរៀបចំឡើងក្នុងគោលបំណងសំខាន់ៗរួមមាន៖
ចូលរួមចំណែកលើកកម្ពស់ការអាន - ផ្សព្វផ្សាយសារៈសំខាន់នៃការអាន ដើម្បីបណ្តុះទម្លាប់អានក្នុងជីវិតប្រចាំថ្ងៃ និងជម្រុញវប្បធម៌អាននៅកម្ពុជា។
ផ្តល់ឱកាសឲ្យកុមារកម្ពុជា នៅតាមខេត្ត និងរាជធានីភ្នំពេញ ចំនួន ១ម៉ឺននាក់ ស្វែងយល់ពីប្រវត្តិសាស្រ្ត រូបីយវត្ថុខ្មែរកម្ពុជា តាមរយៈការទៅទស្សនា សារមន្ទីរ ស.ស.រ។
ថវិកាទទួលបានពីការចុះឈ្មោះទាំងអស់ បូករួមជាមួយថវិកាបន្ថែមពីអម្រឹត នឹងយកទៅ
ឧបត្ថម្ភ ទិវាជាតិអំណាន និង ពិព័ណ៌សៀវភៅថ្នាក់ជាតិ សម្រាប់រយៈពេល ៣ ឆ្នាំ
រៀបចំដំណើរទស្សនកិច្ចសិក្សាសម្រាប់សិស្សតាមខេត្តចំនួន ១០.០០០ នាក់ នៅសារមន្ទីរ ស.ស.រ សម្រាប់រយៈពេល ៣ ឆ្នាំ
ឧបត្ថម្ភការផ្សព្វផ្សាយពីសារសំខាន់នៃការអាននៅតាមខេត្តមួយចំនួន សម្រាប់រយៈពេល ៣ ឆ្នាំ
អាស្រ័យហេតុនេះ គណៈកម្មាធិការរៀបចំព្រឹត្តិការណ៍រត់ប្រណាំងដើម្បីសប្បុរសធម៌ សូមគោរពអញ្ជើញ កីឡាករ កីឡាការនីទាំងអស់ រួសរាន់ចុះឈ្មោះដើម្បីចូលរួមការរត់ប្រណាំងនៅថ្ងៃទី២៤ ខែឧសភា ឆ្នាំ២០២៦ខាងមុខនេះ កុំបីអាក់ខានឡើយ។
